သွေးဆိပ်သင့် ခြင်း

သွေးဆိပ်သင့် တယ်ဆိုတာ ခန္ဓာကိုယ်ထဲကို ရောဂါပိုးဝင်တာတဲ့အခါ ခုခံအားစနစ်က ဓာတ်ပစ္စည်းတွေကို ထုတ်ပြီး ပြန်တိုက်ခိုက်လို့ ဖြစ်လာတာပါ။ ဒီရောဂါက ဆိုးရွားပြီး သေနိုင်လောက်တဲ့အထိ ပြင်းထန်ပါတယ်။ သွေးဆိပ်သင့် တာကို ၃ဆင့်ခွဲလို့ ရပါတယ်။

• ရောဂါပိုးတွေ သွေးထဲကို ရောက်လာပြီး ခန္ဓာကိုယ်ရောင်ရမ်းလာတာကို ‘သွေးဆိပ်သင့်’တယ်လို့ ခေါ်ပါတယ်။
• သွေးဆိပ်သင့်တာကြောင့် ခန္ဓာကိုယ်မှာရှိတဲ့ အရေးကြီးတဲ့အင်္ဂါတွေဖြစ်တဲ့ နှလုံး၊ ဦးနှောက်၊ ကျောက်ကပ်တွေကို ထိခိုက်လာပြီဆိုရင် ‘ပြင်းထန်သွေးဆိပ်သင့်’တယ်လို့ ခေါ်ပါတယ်။
• သွေးပေါင်တွေပါကျပြီး အဆုတ်တွေ၊ ကျောက်ကပ်တွေပါ ထိလာတယ်၊ တခြားကိုယ်တွင်းအင်္ဂါတွေပါ ထိခိုက်လာတယ်။ သေဆုံးတဲ့အထိပြင်းထန်တယ်ဆိုရင်ေတာ့ ‘သွေးဆိပ်သင့်ရှော့ဖြစ်’တယ်လို့ ခေါ်ပါတယ်။

သွေးဆိပ်သင့်တာက လူတိုင်းဖြစ်နိုင်ပါတယ်။ အသက်ကြီးတဲ့သူတွေ၊ ခုခံအားနည်းတဲ့သူတွေက ပိုပြီးသတိထားရပါမယ်။

ဘာလို့ သွေးဆိပ်သင့် တာလဲ။

ခန္ဓာကိုယ်ထဲကို ဝင်လာတဲ့ ဘတ်တီးရီးယား၊ ဗိုင်းရပ်စ်၊ မှိုပိုးစတာတွေက သွေးဆိပ်သင့်တာကို ဖြစ်စေပါတယ်။ ဒါကြောင့် ခန္ဓာကိုယ်ရဲ့ ဘယ်နေရာမှာပဲဖြစ်ဖြစ် ပိုးဝင်ဝင် သွေးဆိပ်သင့်တတ်ပါတယ်။ ဥပမာပြောရရင်

• အဆုတ်ရောင်ရောဂါ
• အစာအိမ်နဲ့ အူလမ်းကြောင်း ပိုးဝင်တာ
• ဆီးလမ်းကြောင်းပိုးဝင်တာ
• မျိုးပွားလမ်းကြောင်းထဲ ပိုးဝင်တာ
• သွေးထဲ ပိုးဝင်တာ စတာတွေပဲဖြစ်ပါတယ်။

ဘယ်သူတွေမှာပိုဖြစ်နိုင်လဲ။

လူတိုင်းမှာဖြစ်နိုင်ပေမယ့် ပိုဖြစ်နိုင်တဲ့သူတွေကတော့

• အသက်ငယ်လွန်း ကြီးလွန်းတဲ့သူတွေ
• ခုခံအားမကောင်းတဲ့သူတွေ
• ဆီးချို ဒါမှမဟုတ် အသည်းခြောက်ရောဂါရှိတဲ့သူတွေ
• နဂိုတည်းက ရောဂါတစ်ခုခုရှိနေပြီး အထူးကြပ်မတ်ကုသဆောင်မှာ ကုသနေရတဲ့ သူတွေ
• ပြင်းထန်တဲ့ ဒဏ်ရာရထားသူတွေ (ဥပမာ မီးလောင်ဒဏ်ရာ )
• ဆီးပိုက်တွေ၊ အသက်ရှူပိုက်တွေ အကြာကြီးတပ်ထားတဲ့သူတွေ
• အရင်က ပိုးသတ်ဆေးတွေ အများကြီးသုံးတာ၊ စတီးရွိုက်တွေ အများကြီးသုံးဖူးတဲ့သူတွေ
• အာဟာရချို့တဲ့တဲ့သူတွေ

သွေးဆိပ်သင့် ရင်ဘာလက္ခဏာတွေ ပြမှာလဲ။

အောက်ကလက္ခဏာတွေက သွေးဆိပ်သင့်တာရဲ့ အစောပိုင်းလက္ခဏာတွေဖြစ်ပြီး ဒါတွေကို လျစ်လျူမရှုသင့်ပါဘူး။

• အဖျားကြီးတာ (၁၀၁’F ဒါမှမဟုတ် ၃၈’C)
• ခန္ဓာကိုယ် အပူချိန်နိမ့်လွန်းတာ
• နှလုံးခုန်မြန်တာ
• အသက်ရှူမြန်တာ (တစ်မိနစ်ကို အကြိမ်၂၀လောက်ရှူနေတာ)

ပြင်းထန်သွေးဆိပ်သင့်ရင်တော့

• သိသိသာသာဆီးနည်းသွားတာ
• သတိမကောင်းတာ
• ခေါင်းမူးတာ
• အသက်ရှူရခက်တာ
• ခြေဖျားလက်ဖျားတွေ၊ နှုတ်ခမ်းတွေ ပြာနှမ်းလာတာ

ရှော့ဖြစ်လာရင်တော့ ခုနကလက္ခဏာတွေအပြင် သွေးပေါင်ထိုးကျတဲ့အထိဖြစ်လာမှာပါ။

နောက်ဆက်တွဲဘာဖြစ်နိုင်လဲ။

သွေးဆိပ်သင့်တာက အချိန်မီမကုသဘူးဆိုရင် သေတဲ့အထိ ဖြစ်နိုင်ပါတယ်။ တခြားနောက်ဆက်တွဲတွေကတော့

ဘယ်လိုနောက်ဆက်တွဲကြုံရမလဲဆိုတာကတော့

• လူနာအသက်
• ကုသမှု မီမမီ
• သွေးဆိပ်သင့်ရတဲ့အကြောင်းအရင်း
• နဂိုရောဂါအခံ စတဲ့အချက်တွေအပေါ်မူတည်ပါတယ်။

သွေးဆိပ်သင့်တာ ပိုဆိုးလာလေလေ ကိုယ်တွင်းအင်္ဂါတွေကို သွေးရောက်တာပိုနည်းလေလေပါ။ သွေးဆိပ်သင့်တာကြောင့် သွေးကြောမှာ သွေးခဲလေးတွေ ပိတ်လာပြီး ကိုယ်တွင်းအင်္ဂါတွေ ပုပ်တတ်ပါသေးတယ်။

သွေးဆိပ်သင့်တာက သိပ်မပြင်းထန်ရင် ပြန်ကောင်းလာနိုင်ပါတယ်။ ဒါပေမယ့် သွေးဆိပ်သင့်တာက ခုထက်ထိတော့ အသေအပျောက်များတဲ့ ရောဂါဖြစ်နေတုန်းပါပဲ။

ကုသနည်းတွေက

သွေးဆိပ်သင့်တာက စောစောသိလေလေ စောစောကုနိုင်လေလေ အသက်ရှင်နိုင်ဖို့ အခွင့်အရေးများလေလေပါပဲ။ ကုသနည်းတွေကတော့

• ပိုးဝင်တာကို ကုသဖို့ ပိုးသတ်ဆေးတွေ သွင်းတာ
• သွေးပေါင်ပြန်တက်အောင်လုပ်တာ
• ဆေးပုလင်းချိတ်တာ
• တခြားလိုအပ်တဲ့ကုသမှုတွေပေးတာ စတဲ့နည်းတွေနဲ့ ကုသရမှာပါ။

သွေးဆိပ်သင့်တာက ပြင်းထန်ပြီး သေနိုင်လောက်တဲ့ ရောဂါပါ။ အသက်ရှင်မလား မရှင်ဘူးလားဆိုတာကတော့ ပိုးကဘယ်ကဝင်တာလဲ၊ ဘယ်လောက်ထိပျံ့နေပြီလဲ၊ ကုသမှုကို ဘယ်လောက်စောစောခံယူနိုင်လဲဆိုတာပေါ် အများကြီးမူတည်နေပါတယ်။

Hello Health Group သည် ဆေးပညာ အကြံပြုချက်များ၊ ရောဂါရှာဖွေအတည်ပြုချက်များနှင့် ကုသမှုများ မပြုလုပ်ပေးပါ။